New year offer 2017

இலங்கை செய்திகள்

அஜித் மன்னப்பெரும - பிரதமரின் இந்திய விஜயம் நாட்டிற்கு பெரும்தலைகுனிவு

02/11/2020

சர்வதேச கடனை செலுத்துவதற்காக உதவி கோரி பிரதமர் மஹிந்த ராஜபக்ஷ இந்தியாவிற்கு விஜயம் மேற்கொண்டுள்ளமை நாட்டிற்கு பெரும் தலைகுனிவை ஏற்படுத்தியுள்ளது என்று தெரிவித்த ஐக்கிய தேசியக் கட்சியின் பாராளுமன்ற உறுப்பினர் அஜித் மன்னப்பெரும, மக்களை ஏமாற்றி ஆட்சிக்கு வந்த ஜனாதிபதி கோத்தாபய ராஜபக்ஷவின் அரசாங்கம் மக்களிடம் மன்னிப்பு கேட்க்க வேண்டும் என்றும் கூறினார்.

ஐக்கிய தேசியக் கட்சியின் தலைமையகத்தில் இன்று இடம்பெற்ற ஊடகவியலாளர் சந்திப்பில் இதனை தெரிவித்த அவர் மேலும் கூறியதாவது,

மக்களை ஏமாற்றி ஆட்சிக்கு வந்த அரசாங்கம் மக்களின் நலன்கருதி எந்தவித செயற்பாடுகளையும் முன்னெடுக்காமல் இருக்கின்றது. இதனால் ஜனாதிபதி கோதாபய ராஜபக்ஷ மற்றும் அவரது தரப்பினர் மக்களிடம் மன்னிப்பு கேட்க்க வேண்டும்.

தேர்தல்காலங்களின் போது வெங்காய விலையை காண்பித்து பெரிதும் விமர்சனங்களை முன்வைத்தனர். என்று உலக சந்தையில் எண்ணையின் விலை குறைந்துள்ள போதிலும் அந்த சலுகையை மக்களுக்கு பெற்றுக் கொடுக்க முடியாமல் இருக்கின்றனர்.

அத்தியவசிய பொருட்களின் விலை தொடர்ந்தும் அதிகரிக்கப்பட்டு வருகின்றது. தொழில் வாய்ப்புகளை பெற்றுக் கொடுப்பதாக தெரிவித்தனர்.  தேர்தலுக்கு முன்னர் அவற்றை பெற்றுக் கொடுக்க வேண்டும். அரசாங்கம் தமது வாக்குறுதிகளை நிறைவேற்ற மூன்றில் இரண்டு பெரும்பான்மையை பெறவேண்டும் என்கின்றனர்.

ஆனால் நல்லாட்சி அரசாங்கம் ஆட்சிக்கு வந்த போது பாராளுமன்றத்தில் குறைவான ஆசனங்களையே பெற்றிருந்த போதும் மக்களுக்கு அளித்த வாக்கை நிறைவேற்றியிருந்தோம் என அவர் தெரிவித்தமை குறிப்பிடத்தக்கது.